Nadakip ang isang lalaki matapos umanong pagsasaksakin nito ang isang taong gulang na batang lalaki sa Barangay Roosevelt, Dinalupihan, Bataan nitong Martes.
Ayon sa ulat mula kay Police Lt. Col. Emil Dela Cruz, hepe ng Dinalupihan PNP, kinilala ang nadakip na si Draco Drackyll Smisek, 19 anyos, taga Cabalan, Olongapo City at diumano’y dumaranas ng mental disorder.
Ang biktima ay 1 taong gulang na bata na residente ng Purok 2A, Barangay Roosevelt, Dinalupihan, Bataan.
Ayon sa ina ng bata na si Donna Faustino, naglalaro umano ang kanyang anak sa labas ng kanilang bahay pasado alas onse ng umaga nitong Martes, na walang anumang dahilan ay pinagsasaksak ng suspek ang kanyang anak gamit ang isang kitchen knife.
Kaagad na naisugod ang biktima sa Dinalupihan District Hospital at nasa malubhang kalagayan matapos magtamo ng limang saksak sa katawan.
Sa mabilis na aksyon ng Dinalupihan Police sa pamumuno ni Lt. Col. Dela Cruz sa tulong ng 1st PMFC Bataan ay kaagad na nadakip ang suspek na nasa kustodiya ng Dinalupihan MPS.