Kasalungsungan nang magmandu keng trapik
Ning Pisuk, antimong peka-barangay tsip
Nyang apansinan ne padatang mabilis
Ing motorsiklu ken a nu’ya magtrapik.
Pinara ne dapot limpasan nya’y Pisuk
Ning magmanehu a katribu ring kulut,
Inya keng kamwa na, king gewa ning diablus
Pamagbalik niti, singilan neng danyus.
E binang mekaba ing pamanaya na,
A migit-kumulang mu king medya ora
Abatiawan na neng iti paratang ya,
Inya naman iti agad neng pinara…
“Oy, obat e mu ku tiknangan man nandin,
A nu’ dapat dakang kaswan ‘overloading,’
Uling apat kayu,” – “Tata, makanyan pin
Ing sangkan nung inya e ku dinyan pansin.
“Nya e ra ka seke, nan’ ku mang isipan,
Kapurit man ala na kang aluklukan;
Manabu ka, aku pang mamakibatan,
Makanyan da ka pin rugung e tiknangan.
Siguru naman pu malino na Tata,
Keka ing rason at babie yung parsala;
Saka ing sangkan a bubusbus yu pala,
Apat na ke rugu, isake ra ka pa?”