Patay ang isang barangay kapitan matapos tagain ng isang barangay kagawad sa Brgy. Ibis, sa bayan ng Bagac, Bataan.
Sa inisyal na ulat, kinilala ang biktima na si Barangay Capt. Danny Boy Panganiban, punong barangay ng Barangay Ibis habang ang suspek ay nakilalang si Brgy. Kagawad Edwin Panganiban ng nabanggit ding barangay.
Namatay habang nasa ospital si Kapitan dahil umano sa grabeng sugat na tinamo nito sa ulo.
Ayon sa ilang nakasaksi, lasing umano ang suspek nang mangyari ang krimen.
Nabatid na ang biktima at ang suspek ay magpinsang buo pa at inaalam pa ng PNP ang puno’t dulo o dahilan ng naturang krimen.
Sa ngayon ay nasa kustodiya na ng Bagac Police ang suspek.