Kilub ning metung a seriosung seminar
A nu’y Pisuk metung ya karing bisitang
Tinagun antimong kinatawan bilang
Ning punong barangay king karelang lugal
Ban makirandam king mesabing okasyun
Antining ya naman ing Administrador;
At uli ning i Kap e ya pin mitagun
I Pisuk yang minta king mesabing pulung.
Miyayaliwang paksa itang mepisabi
Kabang tahimik yang makirandam iti,
Mupin ulining mepuyat ya nabengi
Lingo ya at alang balung mepisabi.
Nung arapat namu mayari na sana
Itang seminar ban mamanuli na la;
Uling bukud pa pin king mitutundu ya,
Dimdam na neng menga-lukguk ing atyan na.
Pero aplit murin ing balitaktakan
Ampon miayaliwang mibuklat a kutang,
Pelalung nung nu’la ring pondu megisan
Ketang oras a’yta mekalkal mu naman.
Angga king miras king nganing Tala-ugit,
“Nung atin ko pa pung buring ipagsulit
O kaya ikutang kaniting penandit,
E ko pu marine ban keni lumapit”
Tinikdo ya’y Pisuk at minye yang galang
Karing pesitagun a karin dinatang,
At king tala-ugit anti murin naman;
At ngana “Nanu ta’ kayang oras mangan?!”