Iba, Zambales- Umabot sa mahigit P1.69 bilyong halaga ng slope protection infrastructure dito sa lalawigan ng Zambales ang nasira dahilan sa pananalasa ng habagat dala ng nagdaan bagyong Dante at Emong nitong nakalipas na araw.
Ayon sa ulat ng Department of Public Works and Highways (DPWH) district offices dito. Karamihan sa mga ito ay mga istrukturang pangkontrol ng baha sa ilog na nasira ng malalakas na agos sa mga daluyan ng tubig na puno ng lahar sa katimugang bayan ng San Antonio, San Felipe, at San Narciso.
Ang mga dike ng ilog sa mga bayan ng Santa Cruz, Candelaria, Masinloc, at Cabangan ay bumigay din dahil sa pag-apaw ng tubig sa ilog at sapa, saad ng DPWH.
Ang pinakamalaking pinsala sa imprastraktura ay inilagay sa P1 bilyon sa bayan ng San Felipe kung saan hinampas ng mga alon ang seawall sa kahabaan ng coastal road sa Sitio Tektek sa Barangay Sindol.
Sinabi ni Zambales Provincial Engineer Domingo Mariano na mahigpit na binabantayan ng mga provincial engineering team at local government units ang sitwasyon sa lahar-silted waterways tulad ng Maloma River at Pamatawan River, dahil ang karagdagang pinsala sa dike ay maaaring magdulot ng matinding pagbaha sa mga bayan ng San Felipe, San Narciso at San Antonio.
Samantala Iniulat naman ng Zambales Provincial Disaster Risk Reduction and Management Office (PDRRMO) na may kabuuang 3,690 pamilya na binubuo ng 11,774 indibidwal sa lalawigan ang naapektuhan na ng walang humpay na pag-ulan at ang nagresultang pagbaha.
Sa mga ito, may kabuuang 1,996 pamilya o 5,832 indibidwal ang lumikas karamihan sa mga paaralan at barangay hall, o tumuloy pansamantala sa kanilang mga kamag-anak.
Ayon kay PDRRMO chief Rolex Estella na ang tanggapan ni Gov. Hermogenes Ebdane Jr. ay nagbibigay ng mga pakete ng mahahalagang pagkain sa mga apektadong residente simula noong Linggo nang bumuhos ang malakas na ulan mula sa bagyong “Dante” sa mga mabababang lugar at nagsimula ang pamahalaang panlalawigan ng pre-emptive evacuation.