Pilan neng duminggung aldo-aldo lilibut
Manintun aluban obra ining Pisuk,
Angga king miras ya dane ning Tulauc
A nu’ na la disan di Posung at Piyuk
Ken king munisipyu ning balen San Simon
A nung nu’ karin ya magobra y Posung;
“Isan” ngana, “sawpan mu ku kang Mayor Wong,
Balita ku mananggapan yang dyanitor”.
“Aru” nganang Posung, “ala nang bakanti,
Aku, casual ku pa murin angga ngeni,
Mayapa yata kang Dhong ka makisabi
Uling ya ing peka-‘little mayor’ keti”.
Malagua’t salita menik ya i Pisuk,
At ikit ne y Dhong, panatag a lukluk
Susulat lele na nitang pasbul palub
King upisina ning mayor a malugud.
“Dhong” ngana pasaup ku sa’ rugu keka
King ba’kung makakit masanting a obra,
Balita – kang Mayor Wong masikanan ka
Inya makapihu kung makapag-obra”
“Agyang e kang Mayor atin kung aibie
Obra” ngana ning Dhong king sabing manene,
“Ay tuto?” ngana ning Pisuk, at saka ne
Kitnan i Dhong, nung nanung obra nang ibie.
“Simpli mu” ngana ning pilyong Dhong kang Pisuk,
“Ing ibie ku kabud ka mu makalukluk,
Manibat king abak – mimisip, luluruk,
Nung ninung pasueldu, akinse’t mapupus”!!!