I Pedru kilub ning aldo-aldo panlub na
King karelang klasi parating tawli ya,
Inya ngening abak ya pang kasiro na
King ‘classroom’ sebyanan na ne ning titser da.
“Obat parati kang mitatawli, Pedru?
E ka pa din’tang e lampas alas otsu!
Nung pane makanyan nanung abalu mu
Karing ‘assignment’ a aldo-aldo babie ku?
“Panupaya yu Mam, e na pu maulit;
Bukas, agyang ala pa pung alas sais
Ipangaku ku pu miratang kung pilit,
At e na mag-absent umpisa keng Lunis”.
“O sige, pero ba’kung lubus abalu
Ing ika king kakung aldo-aldo tuturu
Atin ka agyang ditak mung ababalu,
Wayni ing kutang a anseran mu pamu:
“Ninu ing kekatang pambansang bayani?”
“I Jose Rizal pu man!” (pakibat piragli);
“Tsamba, ngeni ka pa mu e migkamali”
“Aku naman Mam ing mangutang saguli”
“Wa sige, nanu ita” ngana ning titser da:
“O ninu naman pu Mam y Atsing Donna?”
“Tabalu…ala kung kakilalang Donna!
At ninu wari yan ba’keng akilala?”
“Oyan, masasabing matalinu kayu
At sobra kasipag keng pamanuru yu,
Pero nanu naman kaya ing balu yu
Inggil keng bisyu na Mam ning asawa yu?”
“Ninu wari ining Donna’ng amanwan mu?
Ngeni ke pa dimdam ing lagyung yan Pedru”
“Mam, para sabyan ku ing tutu kekayu…
I Donna, kabit ne pu ning asawa yu!”