Ing terminung iti malagad lang bina
Ding e re balu ing nanu pang salita
A kaugne niti king sabing aliwa,
Lalu nung yan e re pa dindam bitasa.
Pero yan e pialung at e klasing sugal
A maki-kasambut o malyaring dakal
Ding pera mu uling atin ka pang palwal
Ditak a ‘cash’ ba’mong akuang aparakal.
Oneng ini anti’mo ing asabi ku
Misan nung yan e re binang kabisadu
Mekad king matsura o bage e ustu
Ing karasan niti a dindam ku mismu.
Lima lang babai a mibabarkada
Ding misan na’yan de itang kumara ra,
Ban keng paluwagan yabe re pin sana,
At anti keni ing meging ‘dialogues’ da:
“Kumare,” ngana ning minunang memuklat
King paksang bage a nasa rang panagkat,
“Nung bisa ka ba’kang makatipun agad,
Makyabe ka kening aisip ming biklat”
“Wapin” nganing metung kareting babai
“Asne king kasanting ining panagkat mi”
“Paluwagan” ngara ding adwa kareti,
“Misan paruminggu ayan daka keti”.
“Wa” ngana ning katlung abe rang dinatang,
“Inya siguradung keka maging mayan”
“Mare, e ku bisa pasensya na ko’ ngan,
Uling ‘Virgin’ ku pa” nganing pekibat nyan!!!