Keta pu kekami ating miyasawa
A parehung ngeni idad nang otsenta,
Pero ninu man ing mag-birthday karela
Keng sikat a ‘fastfood’ deti mamangan la.
At nandin ping bandang alas dyes ning abak
I Apu ya pa ing kang Ingkung menagkat
Lumwal la ban agyang mapali mung sopas,
Ing birthday ning matwang babai milabas.
Kabud karas da ren keta king Jollibee,
Minorder yang agad ing matwang babai;
Adwang silyo sopas, at ngana pa niti:
“Medyu bilisan yu, danupan na kami”
Ing inorder deti kabang kakanan da,
Ing matwang babai e no’ patdan mata
Ding adwang ‘teenager’ lele ning kubeta
Ning mesabing ‘fastfood’ malapit iskwela.
Kabang den pasimpli lang mipangarinyu
Agyang karen ating makakit a tau,
Inya ining matwang babai, balamu
Anti yang megyam o merirya siguru.
“Ompong neng makakit kung kalupa na nyan
Anti ku mong’ sisilaban a katawan,
Agyang matwa ta’na e ku balung sabyan
Nung bakit mapali ku pa pakiramdam?”
“Obat e pin anti ka mong masisilab
A pakiramdam keng ikit mu neng berat?
Lon mo reng susu mu a maybug managbag
Makasoso lang keng kakanan mung sopas!”