Baket kasaspak mung salu ing tagumpe
Ning para mung taung lalagu pagkabie?
At anti mu waring maybug pakipate
Potang damdaman mung iti pupuryan de?
Baket anti ra ka waring lalasunan
Potang yang paksa ning nanu mang kayapan?
At nanan mu na ken ing ating salangsang
Ban ing kaplas mung lub mirin’ kapaldanan.
Misan nanan mu’na ing mitakid ya sa’
King ba’yang misakab king bie nang payapa,
Pablasang bina mu rugung katutula
Ing akit meng bigu keti king masala.
Ala kang akakit nung e ing mali na
A keta agad mung king dalan titinda,
Pero nung kapuryan sa’ ing agawa na
Angga mu pin ketang sasalikut mu pa!
Yan, king kapilan man e sukat mamale
King pilubluban ning taung masalese;
Uling imbes maka-kayap king keyang bie,
Mekad mu – king marok karin ne atake!
