Ing Migkunsulta king Doktor

I Juan pikabaluan agpang king istorya,
Bukud king asne king katamad liñgo ya;
Inya naman agyang migit neng singkwenta,
E na pa aisip ing pamakyasawa.

At uli ning iti ulila neng lubus,
Asu nia at pusa ing kayang kalukup;
At den king aldo-aldo ila rugu kabud
Kasulu nang pane, kayabe matudtud.

Makanyan man agyang maki-apalya ya
Keng gulut ngara pin, daranup aliya
Uling ding kasamak da ring pengari na
Atin lang yatad a dake keng pupul da.

At iti pin ya ing kayang pangabiabyan
Ampon paragastus niti keng pamangan;
Mupin agyang e ya daranup intasang
Madalas tiktak ya keng kapangalingwan.

Misan, kabud namu anti yang mipakde
Kabang mamadwas ya gilid na ning tete
Kasi aisip na ing pabalikan ne
Ning doktor a nu’ya misan pepalawe.

At ba’nang abalu ing meging resulta
Pabalikan ne’yti ‘after 3 days’ pala,
Kaybat nang tiparan ing egana-gana
A penabilin na pin ning doktor kaya.

“Dok, aku’ytang migpa-ulu banwang metung”
“Wa, balu ra ka pa” ngana niting doktor,
“Ikutang ku mu sa’ nung malyari na kung
Mandilu uli ning ala na kung sipun!”

WP2Social Auto Publish Powered By : XYZScripts.com
https://m.youtube.com/c/iorbitnews