Ing Sakristan

Dakal na ing kwentu a kanakung dindam
A makarikil keng paksang pam-pisamban,
At nu’ ing metung a e ku akalingwan
Ing tungkul keng mapanyilip a Sakristan:

Misan ating adwang mipalsintang linub
Ban king pisamban da patunayan lubus
Ing matibe sumpa a keta pibuklud
Ding pusu ring adwang tapat king panirug.

A nu’ ining Piyuk a magugumasid,
Kabang king koru ya tahimik manyilip,
Darandaman na ing sumpa rang matalik
Ding adwa busal ning malumbe penandit.

“Pulisan mu ing lwa karing kekang mata”,
Ngana ning lalaki kabang mipamun la;
“Pakatandanan mung pusu ku keka ya,
At e ku gawan ing paimburisan da ka”

“Joseph, ing bukud ku mung pigaganakan
Kanyang panlako mu, ya itang kagalang
Karas mu king States, sulat o nanu man
A manibat keka lubus makalingwan?”

“Nelly” nganang Joseph, “pakabitasan mu
Ing e ra ka akwang kalingwan king bie ku,
Saksi ke ing atyu babo tandanan mu,
E ku gawan keka iting isipan mu”

“Oy nanung pakialam ku kekayung adwa?
Atin yamung keni kaku papagawa,
Ing Kura nung inya aku e ku bisa
A maging testigu, ninu man ing mimwa!

WP2Social Auto Publish Powered By : XYZScripts.com
https://m.youtube.com/c/iorbitnews