I Pisuk uli ning mikaka-idad ne
At magdili-dili king metung a bale,
Ngeni na aisip ing malungkut a bie
Ning magsasarili at alang kayabe
O asawang king bie na akatambayan
Antining king keyang ulilang kabilyan
Asu la at pusa ding pane abe nyan
Pati king aldo-aldo oras nang pamangan.
Isip-isipan na ing ninu pa karing
Keyang kepalsinta ing karen posbling
Ala pang asawa at ikasal tambing
Kabud ing babai tinangu ya murin.
Oneng ing masulit maski metung mu man
Karing meging sweetheart nang Pisuk ala nang
Dalaga uling ning mekiasawa no’ ngan,
Nung inyasa’t iti e ne migmaselan.
At e ku na sabyan nung nanu ya lagyu,
Ban ala nang taung lubus makabalu,
Mas siguradu ne ing derang a tuyu,
Kesa ngara pin keng susulapo pugu.
Inyang arapan ning altar atyu nala
At bayu ibie ring peka-donasyun da,
“Sana” nganing Pari, “ding yabut mung kualta
Kasing lagu re ing kekang ayasawa”.
“Oreni pu Among,” ngana ning lalaki
Kagnan ning dinwang no’ ring alagang beinti;
Oneng inyang ing ‘bride’ asulyapan ne’yti,
Sibli no’ ning Pari ding eksaktung kinsi!