Metung yang babaing singkwenta anyos na
Ing minta king doktor ba’nang ikonsulta,
Nung magkanu dasan ing magpa-facelift ya
At maglupang anak pa keng idad treynta.
Pekibat ning doktor garantisadu miss
Ing sadyang itsura yu kakung abalik,
Mupin dasan na ring dos syentos mil migit
Ning doctor’s fee, saka panulung magamit.
Kamal naman pala ngana ning babai,
Keng treynta mil doctor e pa pu malyari?
Obat itang metung yung meging pasyenti,
Sabi na kanaku migit mu pung beynti?
Dependi kasi king nung nanu ngang gawan
Keng itsura na ning pasyenti nung misan,
Ating mura, pero pota e yu naman
Aburi king agyang asna kababa yan.
Karing alang sapat a pera king bulsa,
Ining kakung yatul ya nang pekamura,
Pero doktor nganing keya migkonsulta
Lagu kung bagya o mibayu itsura?
Miss, gagarantyan kung ini makayanak
At matipid karing alang kwaltang sapat,
Wayni ing tsupun ning sususu pang gatas,
Isubu mia mu yan maglupa kang anak!