Maluat neng malsintang lihim ining Pisuk
kang Sion, a bunsu nang anak matwang Enuk,
A ing opisyu na, mamagtindang langguk
miayaliwang gule, aslam ampon baguk.
Ining Pisuk agyang ala’ng balung obra
nune kubrador mung jueting king baryu ra,
Aisip na niti ing pamakiasawa
at ini ping Sion ing bukud apili na.
Malagua’t salita, misan a tikatik
ing patak ning uran – aisip nang menik
Dinalo misan pa, ban iting matalik
nang sinta, ipasyag king pang-walung balik.
Kabang mi-arap la ketang lamesita
lele na ning awang, bale ning dalaga,
Ining Pisuk e miratun king lukluk na
kabang i Sion pane itang sisingut ya.
“Sion, marahil balu mu na,” nganing Pisuk
“ing sangkan nung bakit ing tinda mung baguk
Pane kung papakyon, pati na ing langguk
ampon aliwa pang malapit nang muluk.”
Timan-timan ya mu ing paglolon a Sion
kaba ping aplit yang didiga ing metung;
Angga king bili ren a maratundatun
bigla ating bala keyatdasan gulung!
Ining Pisuk menga-palatut ya rugu,
Nan’ nemang agwantan mesikan pang lalu;
Inya keng dine na ta’nya miparuku
at keta anti yang mipakat king bangku.
Keng pamamigil nang mipakayli ning Sion,
ban i Pisuk e ya dumine maragul,
Ay rugo… linobo itang kayang sipun
a linwal mingatba ring busbus nang arung!
King milyaring iti, ninu karing adwa
ing mas makarine king milyaring bigla?
Ay tabalu, pero ing mas makatula,
ing kabud na ating tugak a sinapa!