King opisyung pamag-manehu o tsuper
Partikular karing pamasadang saken,
Ating pasaherung maki-kalokwan ken
A pikabalwan a ‘God knows Hudas not pay;.
Keng pilan nang besis pamisake-sake
Ning metung a taung madalas sasake,
Apansin nang Pisuk king iti ing pane
Kagulutan na ning “driver’s seat” lelele.
E wari kareng dyip, nung ating mamayad
Menasa ing pera yabut dia maralas
Karing makasake malapit king arap
Ban ing pamasahi king tsuper ya miras?
Pilan na’nang besis apansinan Pisuk
Ing keng kagulutan na pane lulukluk,
E mamayad, at ding kaya ra mu yabut
Ding aliwa ilang papasa na alus.
Mipaintagun kabud na sinalingalngal
Ing buluk kilub ning dyip nang mamanewan,
At apipihu nang ing keng kagulutan
Na mismung Pisuk ing mitdas a pitaklan!
Mipapaglalawe la ring pasaherus,
At anting mangutang nung ninung minatut?;
Uli ning alang kareti alang migpalpatuk,
Anti kanini ing aisip nang Pisuk:
“Pakisuyu na mo’ karing e pa bayad,
Ipasa da na la mu pu kening arap,”
Dapot pilan nang segundu ing milabas
Tahimik mu, alang bitasang mekibat.
“Ita pung minatut” ngana nining Pisuk,
“Ing pamasahi na e ne pa inabut”.
“Bayad na ku!!! Nganing gilisak na kabud
Ning king kagulutan niti makalukluk!