I Pisuk machu ya at tune lalaki
Nung pakatingiran me bosis manyabi;
Ing pintas, masyadu yamung mataloti
Neng ing asawa na yang keyang kasabi.
Pablasa ping ining keyang meging misis
Mapangalalu ya ampon sobra sungit;
I Pisuk anti reng biklas kang Adonis
Ing lupa nang alang bakas mang tigidig.
Misan atyempuan ne rugu ining Pisuk,
Atin yang kasabing babaing mabugtut;
Sukat alang kutang agad neng penukduk
Nining asawa na ing keyang karungut.
Kabang ini rugung babaing disan na
A kasabi nining Pisuk king bangketa,
Atin yang payntunan a kamag-anak da
A malapit mu king kalye kalele ra?
Mapnamu pin ining kalulung babai,
E ne pepa-pulis o migreklamu’yti;
Pero ining Pisuk king bage milyari
Tintu na ing dapat pasdalan ne iti.
At ban e maglumo king e ustung dapat,
Ing keyang misis a sobra keng kataras;
Magpakatatag ne kanung miamas-amas,
At e ne paysaul keng matning gulisak.
Inya naman, misan a mikakalatang
Ya keng pali buntuk ing asawang hirang;
Uling i Pisuk e menese apunan,
At i misis ibat neman keng sugalan;
Gilisakan ne’yti, asna king kasikan:
“Oy lalake, ot e ka tinun apunan?”
Mekibat ya’ y Pisuk, gulisak mu naman:
“Wa manese na ku” ngana, “PILAN GATANG?!”