Walu na lang banwang miabe ring miasawa
Dapot ala la pang linto meging bunga;
Sibukan da na ing king Obando minta
Ban tumerak pero bigu ing pake ra.
Ing pemangawa ra mialiwa nang bage,
Ating pasalungat at ating pabakle;
Maki-tumbang presu ampon patalete,
Dapot eria’palto ing maging pangane.
Inya ketang Lunes, apiyagkatan da
Ing munta king doktor banting magkonsulta;
Sinuri nong ustu… at nyang magbalik la,
Sabi na ning doktor adwa ing resulta.
Masanting ya ngana’ing metung a balita
Dapot matsura ya ngana ining kadwa;
Ing masanting ya na ing pinili ra pa…
Ngana king babai: “Dapat kang magsaya.
Mag-atlu neng bulan misis ing bugtut mu,
Basi king ‘frog test’ a maingat gewa ku ”;
Panamdam ding adwa mikaul lang ustu,
At nganing mister a sobra kakusuelu:
“Nung lalaki ya yan kaku te’ palagyu
Ban kanita kaku ya mamuling lalu”;
At nganing misis a biglang miparuku:
“Nung yan ing buri mu, ikang bala rugu”.
Palwal no king pasbul inyang magbuelta ya
I mister, at ngana: “O itang matsura,
E ye pa sinabi… nanu ya pu pala?”
“Meyakit ing ala kang mabie semilya!”