Nung semasan ku sa’
Ing kakung sarili at e migpabaya
King pamagaral ku
Kanitang ing bili magkolehiyo na sa,
’Mekad nung e ku man
Inhinyero ngeni a kapad dang bina
Ding kakung pengari,
A’yala na yatang kabas king ganaka,
Marahil metung ku
Karing pekatanyag a Talapamingua
Ding pakakalulu,
Laban king mabanding mapanalipusta.
O nung ali kaya,
Pihung medisina ing kakung ayari,
A metung mu naman
Karing propesyun a parehu rang buri;
At uling karela
Mas matimbang kesa king krus ning salapi,
Ing karing salunan,
Makapanulu ku king maskup dang bili,
Makusuelu na la
At alang nanu mang panayan a sukli;
Makanian kasampat
Ing kaku pignasan dang maging taguri.
Saying… mipabusten,
Lesak ning kelan kung malasakit ganap
King tagimpan deti
A maging metung kung mapuri rang anak;
Uling nung e ku sa’
Meging suwail at miniayang mung oras
King kelan masabal
Ampon interes king karelang paninap,
At nung kenu-kenu
Mekipagbarkada’t kinawe king alak,
Alang sangan e ku
King Campus ning U.P. makalmang dinalpak;
Nung nu’ ing talindo
Ding kaku pengari metupad sana ngan,
At mekilala ku
Lagyu king taguri a kalang-alangnan;
At e na kalupa
Ning kaku yaus da ngeni ring keraklan:
“Oyan i kalasing,
Makasingku litrus ne namang pihu yan,
Anya sunde-sape
Ne namang maglakad libutad ning dalan!”
Makanian kasalpak
Ing bunga ning bigung paninap nang Inang! *
