Ing Anak a malikut keng klasi

 6 

Misan, uling asne kalikut keng klasi
At palpipate ya mu namang parati
Karing kaklasi na ing anak nang Vicky,
Aisip ning titser, ipayaus de iti

Ban akarungut ne’t asabing personal
Arapan na mismu ning ‘school principal’
Ing pamangawan na a e makalugal
Ning anak a iti keng kayang pamagaral.

Malagua’t salita nyang mirungut na la
At asabi na ning titser ing problema,
Kabud-abud ining Inda kinatak ya
At nung nanu-nanu itang teladtad na.

“Makanyan mu pala” ngana pa pin niti,
“Inaus yu ku ban papuntalan keti?”
“Misis buri mi mung ipabalu kasi
Ing sobra ya galo kilub na ning klasi!”

“E na kailangan ing ipayaus yu ku
Uling balu ku ne dapat ing anak ku;
Kalupa na naman king bale neng atyu
Mapamuska ya at magalo masyadu.

Pero daig neman kagalo ing palus,
Angga king aku mung dili ing kakalus;
Ika… asna dalas mu kung ipayaus,
Pero aku – e ra ka pa pepayaus!”