Ya’pang kasungo ku king pasbul a sasag
Ikit ku ne y Pisuk babo na ning papag
At nu’ keng bitis na soga yang damulag
Ing asna katigik a pangabalibad.
“Ninanu ka Pisuk at ninung mitali
Keng bitis mu?” nganing, kitang kung piragli;
E mekibat, at ing panig a sawali
Ning keyang tuknangan ing digdug nang matni.
“Bisa na kung mate” (e mingutngut keng kyak)
“Uli ning bigu ku king kakung paninap
Ayasawa ke ing anak nang Mang Kulas,
A migpusitara ngeni pamung abak”
“Dakal a babai” ngaku naman keya
“Ot pagsalbatan mu ing mekiasawa ya?”
“Ali, ali na ku miuman pang malsinta
Nung kaybat kabigwan mu ing karasan na!”
“King buri mung sabyan magpakamate ka?”
Nung inya makanyan dakang disan pala?”
“Wa, magbigti na ku uling nanan ku pa
Ing mye nung ala ne king bie ku i Juana!”
“Ot e me keng batal piluput ing soga,
Nung talagang ika magpakamate ka?”
“Kase, magkasakit ku ping mangisnawa
Inya kening bitis ku nia kebit” ngana!