Huwag Pigilan ang Bayanihan, Palakasin ang Tulong sa Mamamayan
Mariing ipinapahayag ng Advocates for Genuine and Outstanding Services (AGOS) ang aming malalim na pagkabahala sa naging hakbang na iniuugnay kay Councilor Tulabut ng San Fernando City na ipatigil ang mga feeding program na pinangungunahan ng pribadong sektor, kasabay ng pagsusulong ng isang ordinansa na magreregulate sa mga ganitong inisyatiba, kabilang ang medical at dental missions.
Ang desisyong ito ay dumarating sa isang napakasensitibong panahon. Sa patuloy na pagtaas ng presyo ng langis, sunod-sunod ang pagtaas ng presyo ng mga pangunahing bilihin at serbisyo—mula pagkain hanggang pamasahe. Ang direktang tama nito ay ang pamilyang Pilipino na araw-araw nang nagbabalanse ng kakarampot na kita upang maitawid ang pangangailangan ng kanilang mga anak.
Sa ganitong kalagayan, ang mga feeding program ay hindi lamang simpleng boluntaryong gawain. Ito ay nagsisilbing agarang sandigan ng mga pamilyang hirap na hirap na. Ito ay konkretong tugon sa gutom na nararamdaman ng mga batang mag-aaral sa araw-araw.
Kinikilala ng AGOS ang pangangailangan ng kaayusan at sapat na regulasyon upang matiyak ang kaligtasan at kapakanan ng mamamayan. Gayunpaman, ang agarang pagpapatigil sa umiiral na mga programang ito—kahit pansamantala—ay isang hakbang na may malinaw at direktang negatibong epekto sa mga pinaka-nangangailangan.
Sa panahong lumalala ang krisis sa kabuhayan, ang bawat tulong ay lalong nagiging mahalaga—at ang bawat pagkaantala ay may katumbas na gutom.
Naniniwala ang AGOS na ang papel ng pamahalaan ay hindi upang hadlangan ang kusang-loob na pagtulong ng mamamayan at ng pribadong sektor, kundi upang ito ay gabayan, suportahan, at palakasin.
Ang anumang regulasyon ay dapat magsilbing tagapagpadali at tagapagpalakas ng pagtulong—hindi sagabal na magpapabagal o hahadlang sa agarang pag-abot ng tulong, lalo na sa gitna ng krisis.
Ang labis na paghihigpit sa pamamagitan ng komplikadong proseso, permit, at pahintulot ay nagdudulot ng agam-agam sa mga nais tumulong. Sa halip na mapalawak ang saklaw ng serbisyo, may panganib na ito ay lumiit—at ang higit na maaapektuhan ay ang mga komunidad na umaasa sa ganitong mga inisyatiba.
Hinihikayat ng AGOS ang lokal na pamahalaan ng San Fernando City na pag-isipang muli ang ganitong hakbang at tiyaking ang anumang polisiya ay nakatuon sa pagpapabilis, hindi pagpapabagal, ng paghahatid ng tulong sa mamamayan.
Ang bayanihan ay isang pundamental na lakas ng ating lipunan. Sa panahon ng krisis—lalo na kung saan ang pagtaas ng presyo ng langis ay nagtutulak sa maraming pamilya sa bingit ng kagutuman—ito ay higit na dapat pinapalakas, hindi pinipigilan.
Malinaw na paninindigan ng AGOS: habang tumitindi ang hirap ng mamamayan, lalong hindi dapat hadlangan ang tulong na kusang ibinibigay ng pribadong sektor.
Ang batang gutom ay hindi makapaghihintay—at ang tulong na naantala ay tulong na nawala.
Alexander S. Cauguiran
Co-Convenor, Advocates for Genuine and Outstanding Services (AGOS)