Bulacan nagbigay ng P1M at 5,000 food packs para sa mga biktima ng Taal Volcano

Facebook Tweet Email Print

Apat na truck na may lulang mga relief goods at P1-million check ang personal na inihatid ni Bulacan Governor Daniel Fernando sa mga biktima ng pagsabog ng bulkang Taal kamakalawa.

Ang cash donation at 5,000 food packs ay personal na tinanggap ni Batangas Governor Hermilando Mandanas mula kay Fernando nang bumisita ang mga local officials ng Bulacan sa Provincial Capitol ng Batangas.

Base sa listahan ni Provincial Social Welfare and Development Officer Rowena Tiongson, bawat isang food packs ay naglalaman ng apat na kilong Bigas, apat na delata, limang pakete ng Kape at dalawang pakete ng noodles.

Personal na iniabot ni Bulacan Governor Daniel Fernando kay Batangas Governor Dodo Mandanas ang isang milyong halaga ng tseke financial assistance mula sa Pamahalaang Panlalawigan ng Bulacan para sa mga biktima ng pagsabog ng Taal Volcano. Kasama ni Fernando sina Bokal RC Castro at Bokal Jong Ople at mga head department ng Bulacan Prov. Administrator Eugenio Payongayong, Rowena Joson ng PSDWD, Liz Mungcal ng PDRRMO, Maricel Cruz ng PPAO, Bulacan PNP director Col. Emma Libunao nang bumisita ito nitong Miyerkules. –Kuha ni ERICK SILVERIO

Ayon naman kay Felicisima Mungcal, head ng Provincial Disaster Risk Reduction Management Office (PDRRMO), dalawang 6×6 trucks nitong tanggapan at dalawang ten-wheeler trucks ng Provincial Engineering Office (PEO) ang ginamit upang bukod sa makapaghatid ng mga food packs, ay makatulong din sa rescue at evacuation efforts.

Mayroon ding isinama na isang ambulansiya na may lulan na medical at rescue teams upang tumulong sa patuloy na rescue, relief at evacuation efforts sa mga apektadong bayan ng Batangas. Kumpleto ito sa mga pangunahing kagamitan gaya ng personnel protected equipment (PPEs).