Atuk-atuk ya keng ayli na i Pisuk,
Nanding asaganan ke lalam sampaluk
Kabang papunta ku kari matwang Enuk
Ban saling metung a silyo lelut manuk.
“Ninanu ka?” ngaku, “anti ka mong’ murit
Mayli kang dili mu, sasagakgak aplit?”
“Makanano” ngana “aloku ke’ing buysit
A magtinda keta a sobra kasungit.
Kuma kang metung a ‘stick’ sigarilyu,
Ing agad nang sabyan e pautang kanu;
Pero karas kareng poging baintau,
Alang ali; at e na pabayad ustu”.
“O nanung koneksyon ning aplit kang mayli
King anti kanyan a panugali niti?”
“Ing kakung aisip ba’kung makaganti,
Gewa ku – migpa-load kung alagang beinti”.
“Makananu me mong’ aloku kanita
Nung linod na ka at memayad ka kaya?”
“E mu na panyabian” nganing pekibat na,
“Ing aku migpalod ku pin nandin kaya.
Pero e na balu ning maturak-turak
Ing aku milangan kia’mu ngening abak,
Kasi pin ala na ku mang celpon, obat
Menwala ya at linod na kung agad-agad/
Makananu ne mong aloku kanita
Ning Pisuk ining masungit a tindera?
Ing makusuelu ken itang ing sim card na
Ning ninu man kabud namu mika-lod ya!