Ining paksang diwa ning kakung poesya
Tutung milyari kang Apu ku kanita
Inya agyang malwat nang milyari kaya,
Ing kakung ikwentu, makapakayli ya.
Kanitang ding usu keng bitis susulud
E la pa sandals o tsinelas a Beachwalk,
Nune kotsu la pa at ampo ping swekus,
Sinake yang bus ing Apu mi keng intud.
Mabie la pa kanita ring La Mallorca
A kabalitan king mabilug Pampanga,
At nu’ ing sekyan na papunta yang Guagua,
Pero karas kanu king Betis kuldas ya.
Kaybat neng kitnan ning kondoktor na ning bus
Nung nu’ munta – kaibat singil dyes sentimus,
Ing kondoktor bayu na ikwang ginulut,
Pidadapitun neng piragling inaus.
At ngana niti king mesabing kondoktor,
“Mama, karas kabalenan ning Bacolor,
Sabyan mu ne ba’kung e lampas Poblacion,
Uling payndalan ku pamu king San Anton”.
Malagua’t salita, miras ne’ing sekyan na
Tulid palengki ning Bacolor kanita;
Ngana ning Kondoktor, “ Apo, Bacolor na!”
Kagnan ning bigla nang sinabi ing “Para!!!”
Tiknang ne ning Tsuper iting mesabing bus
Tulid ning mesabing palengki Baculud;
Pero nyang kuldas ne – Aba, kabud-abud
Panintunan no’ring kaparis nang swekus!
“Oy kondoktor” ngana, “nu’mo kebit, abe
Ding swekus ku nanding keng bus ku sinake?”
“Inta wari Apu nukarin mo’ kine?”
“Kening tukuran na nining pasbul, syempre!”